Хабар берилганидек, бугун Ўзбекистон Профессионал Футбол Лигаси мутасаддилари ҳамда ПРО-Лига клублари раҳбар ва бош мураббийлари иштирокида видеоконференция ўтказилди. Айнан, ушбу масофада туриб ташкиллаштирилган онлайин йиғилишда чемпионат баҳсларини қайси формат ва қачондан бошлаш ҳақидаги масалага ойдинлик киритилди.

Нуфузи бўйича Суперлигадан кейинги ўринда турувчи ПРО-Лига баҳслари июль ойидан старт олиши кутилмоқда. Унга қадар эса мазкур Лига иштирокчилари учун Ўзбекистон Кубоги баҳслари 23 ва 28 июнь куни ўтказилиши режалаштирилмоқда. Ўз.ПФЛ тез орада чемпионат ўйинларининг янги тақвимини эълон қилади.

Видеоконференцияда 8 та иштирокчидан иборат турнир дастлаб, 2 даврада ўтказилиб, 14 та турдан кейин мусобақа турнир жадвалидаги ўринларга қараб икки гуруҳда – Суперлигага чиқиш учун курашадиган 1-4-ўринларни эгаллаган ва Лигада қолиш учун курашадиган 5-8-ўринлардаги жамоалар  ўртасида бўлиши ҳақида келишилди. Ушбу икки гуруҳда ҳам ўйинлар уй ва сафар тизимида ўтади. ПРО-Лигада 1-ўринни олган жамоа тўғридан-тўғри Суперлигага чиқса, 2-ўриндаги клуб Суперлигада 13-ўринни эгаллаган жамоа билан плей-офф баҳсини ўз майдонида ўтказади.

 

Маълумот учун, ПРО-Лига-2020 турнирида “Динамо” (Самарқанд), “Нефтчи” (Фарғона), “Истиқлол” (Фарғона), “Турон” (Яйпан), “Хоразм” (Урганч), “Шўртан” (Ғузор), “Зомин” (Зомин), “Оқтепа” (Тошкент) клублари иштирок этишади.

Эслатиб ўтамиз, Про-лига 1-тур учрашувлари баҳслари қуйидагича кўриниш олганди:

ПРО-Лига-2020. 1-тур.

“Нефтчи” – “Динамо”

“Хоразм” – “Турон”

“Оқтепа” – “Зомин”

“Шўртан” – “Истиқлол”.